مشهد واحد
(قاعة محاضرات اضاءة باهتة......نشاهد شخص يرتدي بدلة ويمسك بمايك طبعا مش بيغني
....)
المحاضرة مملة وخنيقة و انا قرفان
و عايز انام
بس عندي ميعاد مهم بعد المحاضرة بساعتين
طب و الحل ؟!!
واحد قهوة زيادة ع السريع من علي الكافيتريا اللي جنب الكلية مع حجر تفاحة لتظبيط الدماغ
اعطيت الاشارة للشباب ....انا طالع ع القهوة وهامشي من بره
اي خدمات ؟!!
واضح ان مش انا لوحدي المخنوق من المحاضرة لأن الشلةكلها صممت علي الخروج معايا
اشطاط (جمع قشطة بالهبل )
و انتي يابنتي رايحة فين ؟؟!! (دي منار صاحبتي الانتيخ علي رأي اللمبي )
انا رايحة معاكم؟
معانا فين؟
الكافيه
ياماما احنا رايحين قهوة شعبية........مينفعش تيجي معانا ؟
( بدأت تدبدب برجليها علي الارض)
ماليش دعوة انا هاجي معاكم!
(يتدخل مدحت ) وماله تعالي يا منار........احنا هنطلع علي كافيه محترم ع الكورنيش ما تحبكهاش( بمعني لاداعي للتعقيد )يا عم مصطفي ؟
اوك اتفضلي بس هنركب تاكسي علي حسابك ؟
مافيش مشاكل .
_______________________________
مشهد 2 (داخل الكافيترا اضاءة قوية وموسيقي صاخبة وتليفزيون كبير و ميلودي غمض عينيك عشان النظرة سهم من سهام ابليس )
الجارسون :اتفضلوا يا باشوات(ميعرفش ان الباشوية اتلغت ) طلباتكم ايه ؟
مدحت : شاي وتفاحة
علي : شاي وتفاحة
(انا ) :زيادة كرمل و تفاحة
منار : زيه
انا :قهوة زيادة يعني ؟
منار: وتفاحة (!!!!!!!!)
انا: نعم يا ختي ؟
منار: نفسي اجرب ....فيها حاجة؟
مدحت : لاء ما فيهاش حاجة
انا : انتي بتتكلمي بجد ؟
منار : ايوه
تم احضار الطلبات و سحبت الانسة اول نفس و بدء وشها يحمر و لا كأنها بتضرب حشيش
طالبتها بالتوقف
رفضت
غادرتهم غاضبا
جري ورأي مدحت و قال لي : بلاش تخلف يابني ؟
نظرت اليه بابتسامة ساخرة وقلت : انا متخلفففففففففففففففففففففففف
_______________________________
الختام .......اتصلت بي منار منذ قليل معتذرة مع وعد بعدم تكرار الامر
فليحيا التخلففففففف
5 comments:
لابدان الانسان يجرب لأن التجربه من احد عوامل الكشف العلمى
سيبوهم يجربوا بس مش كل مره تسلم الجره.
محمد سامي
شريعة و قانون
موضوعك حلو يا استاذ بس رأيك فيه ازدواجية
يعني اشمعني رفضت ان البنت تشرب و انتم قاعدين معاها بتشربوا
انا عن نفسي بشرب و اهلي عارفين و نصحوني اني ابطل بس مش عارفة ايه السبب عشان كده رفضت ابطل
وكل يوم باروح الكافيه و اشرب تفاحة مع صحابي
بس بصراحة برش برفان علي نفسي عشان الريحة يعني وكده
وفاء.اسكندرية
صباحه بدنجان
تعليقاتكم غريبة اوي يا شباب
يعني ايه التجريب في البحث العلمي و ايه علافته بالشيشة
و الست وفاءضحكتني اوي عشان مش عارفة ايه سبب رفض اهلها لتدخينها الشيشة
عارفة ليه يامزة .
عشان البت اللي بتعمل كده سيرتها بتبقي زبالة قوي
الشيشة والسجائر يعتبران من الخبائث وقال الله تعالى (يحل لكم الطيبات ويحرم عليكم الخبائث)
كما أنهما تدمير للصحة واهدار للمال
قال الله تعالى (ولا تلقوا بايديكم الى التهلكة)
وبالتالى فالشيشة والسجائر حرام شرعا سواء للبنت او للولد
والشيشة عيب فى حق الولد والبنت
جائز أنه متعارف فى المجتمع المصرى انها عيب فى حق البنت اكثر ولكن فى الحقيقة فهى فى حق الاتنين سواء
Post a Comment